Nyheitsbrev nr 1, Rosendal Utvikling.
Hei alle😊
No har eg jobba i RU i ganske nøyaktig eitt år, og på den tida har det vore litt av kvart å setje seg inn i😊
Hausten 2021 arrangerte vi kurs i det å vere synleg på nett. Dette kurset gjekk over 5 kveldar. Då kom Magnhild Haugland frå lokalkrafta og underviste oss i rett og gale når det gjeld sosiale mediar. Ho teikna og forklarte, svarte på mange gode spørsmål frå oss, og gjorde det heile godt forståeleg for oss som ikkje er så trygge på denne sosiale media verda. Tusen takk til Magnhild.
I desember arrangerte vi matmarknad i dei gamle lokala til banken. Litt fråfall pga corona og andre uforutsette ting, så vart det ikkje så mange «stands» men dei som var selde godt og var fornøgde. Det var kjekt å kunna gjera slikt til tross for at coronaen herja då.
RU har og bidrege med søknader til Sparebank 1 stiftinga, SIM miljøfond, Eide Fjordbruk og Mowi om økonomisk stønad til Parken Langs Elva. Dette prosjektet er eit samarbeidsprosjekt mellom Rosendal Helselag og Rosendal Bygdelag i lag med Svein Jarle Mehl som prosjektleiar. Der har vi fått inn over 400 000,- til prosjektet. Det kom og ei pengegåve frå Fjæreskulen på litt over 24 000,- Veldig takksame for all hjelp. De må ta dykk ein tur og sjå den flotte hytta som Ove Stokka har bygd der, heilt fantastisk. Det står att å få på plass permanente møblar i hytta men dei er satt i produksjon av Ove Stokka. Ove skal og lage forskjellege leikeapparat til Parken. Det skal kome ljos både ute i parken og inne i hytta. Alt kostar pengar og det er sendt nye søknadar til Sparebank 1 stiftinga.
RU er og engasjert i kampen for å behalde den Fylkeskommunale tannlegen i Rosendal.
I juni inviterte vi Linda Bøthun frå Zenit – Business coach til å kome og halde foredrag for oss. Det vart nokre inspirerande og lærerike timar på Folgefonnsenteret der ho snakka om blant anna: «Arbeidsglede = Gode resultat». Ho var og innom kommunikasjon, yrkesstolthet, teamrelasjon, kunderelasjon, sjølvleiing, motivasjon, mål og visjon. Alt lika viktig i ein arbeidskvardag!
Eg bruker Facebook flittig der eg promoterer og legg ut blant anna annonser for medlemmar. Har og Instagram side, men er Facebook som blir nytta mest. Der prøver eg å samla relevant informasjon og legge ut på RU si side, Handlegato i Rosendal si side og Bubilparkeringa si side. Der informerer eg om diverse arrangement og opningstider til butikkar og restaurantar som er medlemmar i RU. Spesielt turistar på Bobilparkeringa set stor pris på å få vite litt om kva som skjer rundt om i området.
Dette var ei oppsummering av «konkrete ting» eg har jobba med i RU.
Utanom dette så har RU engasjert seg i Kvinnherad 2050, Kommuneplanen sin samfunnsdel. Der kom vi med merknadar til planen som alle vart tekne med vidare. Vi jobbar og med Områdeplanen for Rosendal, og for ny Idrettshall i Rosendal. RU har hatt møter med kommunen angåande bustadareal og næringsareal. RU oppmoda kommunen om fleire ladestasjonar for el-bilar i Rosendal, og det vil kome på parkeringsplassen nedanfor den nye gravplassen. RU har og sendt innspel til Regional Transportplan 2022-2033 for Vestland der vi skreiv: Rosendal Utvikling meiner ein må sjå på forbetring av vegen frå Kvinnherad til Bergen. Der er fleire strekningar som er som flaskehalsar for vanlege bilar og ikkje minst for tungtransporten. Det er daglege leveringar til fleire aktørar i Kvinnherad og bygdene langs vegen frå Bergen. Det er store køyretøy og fleire stadar er det ikkje mogleg å passere to samtidig. Strekninga opp Mundheims dalen med bakkar på kvar side vil ikkje krevje dei store økonomiske investeringane men vil gjere stor forskjell for køyringa om ein kan passerer to og to utan at den eine må stoppa. Strekninga Kilen – Holdhus er og ei strekning som bør forbetrast, den er smal, svingete og lite oversikteleg, her er ikkje plass til to og to bilar eller trailerar å passera samtidig.
Dette er noko av det vi jobbar med i Rosendal Utvikling.
Pr i dag er vi 57 medlemmar i frå Sundal til og med Dimmelsvik, store og små bedrifter. Eit samfunn består av mange store og små tannhjul, der alle er lika viktige for heilskapen, tilbodet og trivselen.
Vi kjem enklare til målet om vi saman kan sjå moglegheiter som kan utviklast for tryggare og fleire arbeidsplassar.
Rosendal Utvikling ynskjer vera ein ressurs for næringslivet. Uansett kva næring vi driv er målet trygge arbeidsplassar og resultat slik at næringa kan utvikla seg og investera vidare. Kom gjerne med forslag på saker og ting de ynskjer vi skal jobbe med, eller arrangere. Ikkje nøl med å ta kontakt.
Mvh Janne Hjelmeland, Dagleg leiar Rosendal Utvikling.
